اؤلكه ميز ايرانين مركز ويلايتينده توركلرين يئرلشمه تاريخي ، حضرت مسيحين ميلاديندان ، بئش مين ايل قاباغا مربوط اولور . قاجار دؤورونده “ ولايت قشقايي” آدلانان شيراز بؤلگه سينده ، ايندي راييج اولان قشقايي توركجه سينده ، 5000 ايل بوندان قاباغا عاييد اولان “ سومئر” توركجه سي نين ايزلري واردير . ميثال اوچون سومئر توركجه سينده “ يير” Yir كلمه سي “ شئعر” معناسيندا ايشله نيردي ، ايندي ده قاشقايي لار آراسيندا “ شاعير” ، “ ييرچي” و شئعر يازماغا “ ييرماق “ دئييرلر . قاشقايي ائلي نين بؤيوك شاعيري اولان “ محمد ابراهيم ميرزا ماذون” قاشقايي ادبيياتي تاريخينده ، “ حيكمت و عيرفان شاعري” كيمي تانينب و بيز مين بير ايفتيخارين بو ساييسيندا اونو معرفي ائديريك .

ماذون دئيير ، هيلال ائتديم بدريمي
اونوتموشام ، مصدريمي – صدريمي
تا ديرىيم كيمسه بيلمز قدريمي
قدريمي بيلرلر اؤلندن سورا .
***

سيد عليرضا اوغلو ، ميرزا سيد محمد ابراهيم ماذون قاشقايي ، 1246 – نجي ه . ق ايلينده شيرازدا وفات ائتميش و شاهزاده منصورون موتبرريك بوقعه سينده دفن ائديلميشدير . بو تورك شاعيرين مزار داشيني ، شاهليق دؤورونده ييخميشلار .

ماذون ، توركجه ، فارسجا و عربجه ني ياخشي اؤيرنميش ايدي . او درسيني بيتيرديكدن سونرا‌ ، مكتب آچميش و اوشاقلارا درس اؤيره دردي . زمانه سينده اولان چتينليكلر و اونون آزاد حيات و دوشونجه يه ماليك اولدوغو ، اونون شيرازا طرف گئتمه يينه سبب اولموشدور ، ماذون شيرازين “ دوكوهك ” بؤلگه سينده قالميش و اورادا ياشاميشدير .

ماذون حياتيندا ، موولوي ، فضولي ، ختايي ، خسته قاسيم ، موللاپناه واقيف ، نباتي ، تيليم خان و مختوم قولي و … آذربايجان و توركمن اوستادلارىنين اثرلري ايله تانيش اولموش و اونلاردان تاثير آلاركن ، اثرلر ياراتميشدير .

ماذونون زامانيندا‌، دئمك اولار بو شاعيرلرين شئعرلري و ال يازمالاري او زامان بوتون ايران توركلرىنين داخيلينده ياييلميش ايدي ، بونا گؤرده ده ماذونون شئعرلرينده ، كيلاسيك آذربايجان شاعيرلري نين آدلارينا راست گليريك . ميثال اوچون :

ديريلسه يدي ” شاه ختايي ” ماذونون دؤورانيندا
بو شئعرين خططي اولوردو ديلىنين تذكيره سي .

ماذون شئعرلرينده ساوه توركلريندن اولان “تيليم خان ”دان چوخلو ايلهاملار آلميشدير . پروفئسور دوكتور زئهتابي بو بارده ده دئيير : ماذونون شئعرلرينده ائله لرينه تصادوف ائديريك كي ، اونلارين وزني ، قافييه سي و رديفي و اساس مضمونو ، تيليم خانين شئعرلرينده واردير . او دئيير : بو شئعرلر داخيلينده ائله لري واردير كي اونلارين بير نئچه بئيتينده نئچه سؤزونو ده دگيشسك ، عئيني بئيت اولار ، ميثال اوچون تيليم خانين :

اي آغالار! بير دودمان چيراغين
كئچيردن چوخ اولار يانديران گرك :

بئيتيني مضمون جهتدن ، ماذوندا بو شكيلده گؤروروك:

اي آغالار ! دودماندا اوجاغي
كور ائدن چوخ اولار يانديران گرك .

ميرزا ماذون قاشقايي عربجه ، فارسجا و توركجه اثرلر ياديگار قويوب ، گئتميشدير . اونون ديوانىنين بيرينجي نسخه سي 1301- نجي ايلده ايستينساخ اولموش و ايندي ايسه الده دير ، اونون توركجه ديواني 1367 – نجي ايلده ، شيرازدا مرحوم شهباز شهبازي و 1381-نجي ايلده ، تهراندا ناصر ايرجي طرفيندن چاپ اولموشدور .

او فارسجا يازيلاريندا سعدي و حافيظ كيمي شاعيرلره توججوه ائدير . اونون توركجه ديوانيندا ، جوره – جوره شئعرلر ، قصيده لر ، غزللر ، روباعيلر ، قطعه لر و ترجيع بندلرله ياناشي ، قوشما ، گرايلي ، باياتي و ديواني لر ده واردير .

پروفئسور دوكتور صديق ، يادمان ميرزا ماذون قشقايي كيتابيندا يازميشدير كي : “ اونون عيرفاني شئعرلري ، قاشقايي ادبيياتي تاريخينده تايسيز شئعرلردير . مضمون و مؤحتوا باخيميندان ان يوكسك سوييه ده اولان ميرزا ماذون قاشقايىنين شئعرلريني ، قاشقايي ائلي نين اوخوموش آداملاري حيفظ ائتميشلر و سينه دن سينه يه دولانديريرلار . عاشيقلار ،‌ اونون شئعرلرينه ، نغمه لر و ترانه لر بسته له ميشلر ” . پروفئسور صديق يازير : “ ميرزا ماذون قشقايىنين قورآن-ى كريمدن و نبوي حديثلردن آلديغي ايلهام لار سبب اولموش كي اونون شئعرلرينده چوخ گؤزه ل تلميح لر و قورآني ايشارتلر ايشه آپاريلسين ” .

ياعلي ، يا علي شاه-ى لو كشف
موبارك تاجينا تبارك الله
وصي موصطفي سرمن عرف
حققه عين اليقين ، كوفره اشتباه
*
لامكان مولكونده گنج-ى عيززتن
كورسويه لاييقن ، عرشه زينتن
قلمه قووه تن ، لؤوحه سرخطن
جبراييل اوستادي مورشيدن بالله .
*

پروفئسور زئهتابىنين ديدييينه گؤره ، ماذون اينسانلاري زور دئمك و باشقالارينا ظولم ائديب ، اونلاري ايستيثمار ائتمكدن ساغينديرميشسا دا ، بدبين ، حياتدان اوز چئويرن ، اينسانلاري خورافات و مووهوماتا تشويق ائدن ده اولماميشدير . شاعير يانسانلاري حياتلاري بويو ، ياشاييشدان عاقيلانه ايستيفاده ائتمه ، شن حيات سورمه يه ، چاغيرميشدير :

من گلمه ديم ماييل اولام هر گوله
من گلميشم بولبول اولام بير گوله
من گلمه ديم غوصصه يئيم ، غم يئيم
من گلميشم همي چالام ، هم دئيم .
*
كوراوغلودان تعليم گؤتور قيلينج چال .
سن مرد اوغول ! غئيرته گل٫ ائت قييام .
*
تا دوشمن ديرىدير دوستا كام اولمان
تا قيلينج چالماسان ، صاحيب نام اولمان .
*
من دئمكدن روستم اولمان ، سام اولمان
اؤزون فيكر ائت ، سهم و صوولت قالمادي .

ماذون قاشقايي ميللتىين زحمتلريني ، ائحتيياجيني ، درد ، فلاكت و حياتيني ياخشي بيليردي .او خلق ايچينده بويا باشا چاتميشدي و بونا گؤره ده او خلق ايچريسينده و ائلخانلاري عدالته و خلق ايله مئهريبان اولماغا٫ اونلارا ياخشي و اينصافلا داورانماغا چاغيرميشدير. ماذون 1268 نجي ه.ق . ايلينده قاشقايي ائلخاني اولموش محمد تقي قلي خانا نصيحتلر ائتميشدير :

ظولمتله دستگاه قوران بىخبر
ييخيلار بو دستگاه ناتمام بير گون
آخير وئرر توخم-ى موكافات ثمر
چكيلر ظاليمدن يانتيقام بير گون
*
خيال ائتسن اولدون شاهلارين شاهي
يئتيردين سن آسومانا دستگاهي
آخير آخشام اولار عؤمرون صاباحي
بو صوبح-ى دؤولتين اولور شام بير گون

مين بير ايفتيخارين بو سايىسيندا تانيتديرماغيندا چاليشديغيميز ميرزا ماذون قاشقايي شرفينه 1377 نجي ايلين تير آييندا بير قورولتاي كئچيريلدي
ــــــــــــــــــــــــــــــــــــــــــــــــ

* بو يازىنين حاضيرلاماغيندا “ديوان ميرزا ماذون قشقايي” ( ناصر ايرجي) و يادمان ميرزا ماذون قشقايي (دكتر صديق) كيتابلاريندان و مرحوم پروفئسور زئهتابىنين “ ماذون حق و حقيقت سئوه ن بير ائل شاعيري ” مقاله سيندن فايدالانميشام .